Miradoiro da Fraga
 Dende
o Miradoiro da Fraga poderemos observar, sen lugar a dúbidas,
unha das mellores vistas que da Ría
de Vigo se nos pode ofrecer. A súa
situación privilexiada, nun dos puntos máis elevados
de Moaña, permítenos dominar unha panorámica
que se estende ó longo do frondoso val
do Río da Fraga ata a súa
desembocadura na praia da Xunqueira, xa convertido no Río
dos Ladróns. Máis
aló veremos o mar da ría, para perderse a nosa
mirada tralos montes que flanquean Vigo, cidade que ó
caer a noite, descóbresenos baixo un espectáculo
de luces que a calquera amante da fotografía lle gustaría
captar. En resumidas contas, un lugar idóneo para alimentar
a vista e ir "abrindo boca" antes de entrar na Taberna A´DE LINO, situada a cen metros escasos do miradoiro.
|
A escasos metros
da Taberna A'DE LINO atópase
o leito do Río da Fraga, un dos máis caudalosos do Concello de Moaña
e que, ó longo do tempo, resultou imprescindible para a economía
e subsistencia dos habitantes da zona; pois ademais de garantir
o rego dos campos de labranza situados nas marxes, a forza das súas
augas provía ós numerosos muíños distribuídos
ó longo da súa canle da enerxía necesaria para
moer o gran do millo e 
producir a fariña destinada
á fabricación do pan. Recentemente procedeuse á
recuperación destes muíños someténdoos
a unha rigorosa restauración e creando unha ruta de sendeirismo
coñecida como Ruta do Río
da Fraga que se estende paralelamente
ó Río da Fraga, trazando un percorrido máis que atractivo tanto
para amantes da natureza como para as mentes curiosas pola historia
e a etnoloxía.
Situada
entre o casco urbano de Moaña e a illa de Samertolameu,
a praia da Xunqueira constitúe o lugar perfecto para gozar
das xornadas do verán en familia, pois a escasa profundidade
das súas augas e a suave transición das súas
mareas representan toda unha garantía para a seguridade
dos máis pequenos, sen esquecernos, claro está,
doutros atractivos tales coma a pintoresca paisaxe que os seus
numerosos areeiros nos ofrecen na baixamar.
A igrexa de San
Martiño do século
XII, situada na parroquia á que dá nome, é
un dos máximos expoñentes da arquitectura do Románico
en Galicia. Así o constatan a súa impresionante
fachada e o seu marabilloso campanario. Tamén son dignas
de mención as festas que en honor do santo se celebran
durante os días 10, 11 e 12 de novembro, momento que os
veciños aproveitan para probar o viño novo acompañado
de castañas nos numerosos furanchos abertos para a ocasión
nos arredores da igrexa.